Assèttati, e parramu:
ma nun ci sunu santi,
e ccà su' fausi chianti
di nui ca vi pinsamu
chê peri supra i rina,
cu sta panzazza china.
Facemu gara a inchiostru,
ni puliziamu a vucca,
e u primu ca c'ammucca
è u cori, chiddu nostru,
vunchiatu di minchiati
burghisi e 'nzuccarati.
Ma comu vi putissi
chiamari frati e soru
su scialu ccà ndâ l'oru
e viautri ndâ l'abissi?
Ju frati 'i n'autra razza,
ca chianci e poi v'ammazza.
A virità ca sentu
è muta e nun fa vuci.
Stutàti trummi e luci:
fussi unu, o setticentu
ccà nun mi torna u cuntu
e 'i mia, di ccà m'affruntu.
Su ti scrivissi, sapissi puisiari
senza chiamari paroli atturrati
cu versi novi, sacciu unni ammucciati,
c’arriniscissi e pruvassi a cantari:
ma nun c’è versu ca parra ‘i tia
e sulu tu si la megghiu puisia.
Mancu lu celu m’aggiuva, nicuzza
ca su ti pensu, cchiù mutu mi pari
e nun mi servi poi mancu lu mari
su ti taliu dintra l’occhi, bidduzza:
e nun c’è versu ca parra ‘i tia
e sulu tu si la megghiu puisia.
Sai ca la genti cchiù nun ci fa casu
passa la vita, ci sciddica a funnu
ma ju vulissi arricogghiri u munnu
‘nsemi a tia cu stu piattu spasu
viri, n’ c’è versu ca parra ‘i tia
e sulu tu si la megghiu puisia.
Jancu e assulatu
e terra di marmuru chianu,
giarnu e salatu.
Pagghiari di spichi luntanu.
Scagghi di luci
e fetu e surura ndê riuni
jettunu uci.
Na coppula e nu vastuni.
Suli ca spercia
ccà 'nfinu a li vini cunsuma:
spira la quercia.
La peddi arrappata dê ciuma.
Chiazza alluciata
e campu di santi ca vivi
ma dintra n' ciata.
U chiummu s'acchiappa câ nivi.
Acidu novu
e dintra la testa mi spiu:
«Unni m'attrovu?».
Paisi atturratu d'Iddiu.
Ricorditi di mia
quannu lu jelu dâ prima matina
ancora niura, e muta e accupusa
ti dirà: «Sona». Chiusa
supra i tia e li cristiani, rimina
na luntana puisia.
Adduma i luci, canta!
Già nun lu senti dê trummi lu scrusciu
dintra li casi 'ntrunati dâ strata;
di la vara abbuccata
stizzi di jancu, e d'oru e di rusciu:
e lu cori si scanta.
Cantunidduzzu santu,
ponu passari cent'anni macari
ma ndâ sti jorna vunciati d'incensu
ti sentu, 'i ccà ti pensu:
vaju unni a notti matina s'ha fari,
unni eternu è lu chiantu.
Nun c'è jurnata, simana o nu misi
senza ca passu lu tempu jucannu:
jocu a nu jocu unni munnu è paisi,
e m'arricrïu cristiani bullannu.
Chiddi ca 'ncontru, ci mettu u bullinu:
c'è lu 'gnuranti, u piticchiu, a majara,
l'autru ca è bestia, e cu fa u critinu,
chidda mutanga, e cu è curtigghiara.
Campu 'i sintenzi, picchì stu munnu
è cumplicatu, difficili, duru;
fazzu accussini, 'ccussì n' mi cunfunnu
ma sti bullini su' peggiu di n' muru:
passu la vita 'nquadrannu la genti
e di sti cristi n' canusciu poi nenti.
«Ad ogni petra nu cauciu ci dugnu»
e mi crireva nu bravu cristianu
ca rispunneva câ ucca e cô pugnu
a cu faceva lu strunzu e u viddanu:
petra su petra, cauciannu e santiannu,
isavu n' ventu ca di pruvulazzu
si n'acchianava, 'ssì tantu ca all'annu
jeva sbannutu, e poviru e pazzu.
Ci sunu petri ca s'hana luvari
pi gghiri avanti, pi crisciri anticchia;
ma ci su petri ca s'hana lassari
comu ma nannu mi dissi ndâ aricchia:
«Pi na pirata ca duni ê cchiù duri
milli ci sunu ca lassi p'amuri».
Genti ca dici: «M'annoia, nun vogghiu»
pigghia curaggiu e ci metti n' cummogghiu,
di chiddi boni, ca su’ 'ssì pisanti
picchì su’ leggeri, vili e vacanti.
Di sti cummogghi n'attrovanu assai
cusuti apposta pê vizi e pê vai:
c'è cu cummogghia cu festi e fistini
e cu s'accupa chê fausi parrini;
c'è poi cu supra ê minchiati s'appizza
e cu curtigghia chiantannu munnizza.
Quanti cummogghi accattamu rirennu
pi nun pinsari ca stama murennu!
Sapi cu è saggiu ca dintra sta gita
sutta i cummogghi s'ammuccia la vita.
