Stujativi u musu,
signori e assissori:
ndà l'acqua u purtusu
si stampa e poi mori.
Su la malavita
l'aviti stampata
ndâ facci e ndà l'ita,
nun c'è sciniggiata,
mimoria, duluri
e mancu giustizzia:
prijati u Signuri
e jittati munnizza.
Piulàti, mischini:
pâ rivoluzzioni
su' tanti i jaddini
ma picca i falconi.
U suli ca spaccava puru i strati
ni cunsumava i scarpi, l'uti e l'occhi,
e u sancu ca culava dê rinocchi
nun era ca a sustanza di l'estati:
e 'n menzu a pugni, cavuci e pirati
parevi nu giganti, e nui i pirocchi;
vattiavi lu bancuni cu li nocchi
n'arrifriscavi i cori chê gilati.
Criscennu ti purtavumu li ziti
passiannu pi la chiazza vucciriusa:
cu coni e cialdi, puru li graniti
parevunu la petra cchiù priziusa.
Ti n'isti, oggi. Ma comu li miti
ddà lapa, chidda tua, n' sarà mai chiusa.
I ciuri spampinati
ca dormunu ccà 'n costu
su' comu ammammurati
ndô mammuru dô postu:
e ju ca sugnu aria
e ju ca sugnu ventu
cu sta facciazza laria
passìu, e n'haju abbentu.
Intra stu beddu campu
ca u vivu u chiama santu
ju l'ummira nun stampu,
e n' jettu uci ô cantu:
i sensi l'haju muti
ca almenu su' vint'anni
ma l'arma nun m’a stuti,
Signuri dê malanni!
Signuri dê malanni
malanni chisti sunu
e u munnu ca cundanni
cundanna chiù nissunu;
sti jorna sunu santi
ormai ccà dintra sulu:
chê maschiri e chê scanti
ni pigghianu pô culu.
Stanotti fazzu luna,
c'a notti è scunsacrata:
di mia nuddu s'adduna
e a tavula cunzata
scunzata pi mia arresta:
pê morti chiddi veri
cchiù nun si fa la festa,
e jemu sempri arreri.
Signuri dê malanni
ccà nui muremu ancora
su nichi, menzi e ranni
ni chiurunu ccà fora:
inchìtini di ciatu,
rapiti i purticeddi,
vasativi u passatu
chê cari murticeddi.
Ci su' paroli
ca si ni stannu ancora 'mmucciati,
e jocanu comu i carusi
supra gli scogghi, di sira
ndâ 'stati.
Ci sunu mari
e muntagni ca nun canuscemu:
taliannuci muti e luntani
ni chiamanu sempri e niautri
n' sintemu.
Ci sunu storî
ca mancu u celu sapi cuntari:
n'aspettanu chê manu isati
comu cumpagni 'i na vota,
chiazzari.
Na vita intera
forsi nun basta: ccà accantu a tia
è sempri na strata addumata
ca m'arricria, e lu passu
cimìa.
Sti manu friddi su' sempri i me manu
e nun pruvari a chiamarmi cristianu:
lassami 'nveci gnuttennu sciroccu,
nun sacciu viviri, ma campu a scroccu,
picchì i probblemi su' comu la pesti
e su n' li scanzi, tranquillu nun resti.
Dammi n' travagghiu ca lentu m'ammazza
dammi l'amici, ma senza i so lazza
ddi quattru soddi pi fari a vacanza
e pi vunciarimi l'ego e la panza;
tutti li sciarri, i dulura e i passiuni
li lassu a viautri e mi moru minchiuni:
tuttu u me tempu è sirenu e pulitu
trasu a sta festa, ma senza l'invitu.
Era estati, e la cicala
ca dâ fami si scantava
cô picuni e cu la pala
pigghiau versu e travagghiava.
E la sira, 'mmenzu ô pratu
s'incappau cu la furmica
ca cu n frac allicchittatu
'ntrallazzava cu n'amica.
Era propriu l'annu arreri
ca ci dissi: «Canta, canta
ma cô 'nvernu arresti a peri!
Cu travagghia nun si scanta».
«Ou biddazza, ma st'annata
tu travagghiu nun ni voi?»
A furmica cchiù arraggiata:
«Ou, ma fatti i cazzi toi».
Quannu ti fermi davanti u purtuni
sutta na notti cchiù scura dô 'nfernu
nun ciâ finiri 'i circari i raggiuni
ca ti purtarru a passari lu 'nvernu:
mentri lu ventu ti spingi luntanu
pigghia u curaggiu cu tutti li dita,
stringilu forti ddà dintra i tô manu
e tuppuliannu poi spia su c'è Vita.
Su t'arrispunni 'i filinia na vuci
comu carizza 'i viulinu orientali
rapi la porta, riaddumaci a luci:
a Virità ca truvasti n' fa mali.
Cercala sempri ndâ lurdi trazzeri:
sulu ndô funnu ci su' i cosi veri.
